Instituti i Shëndetit Publik ka dhënë alarmin për fruthin. Nga data 1 janar deri në 5 shkurt janë prekur 51 persona nga fruthi.

Rastet më të mëdha janë shënuar në Tiranë dhe grupmosha më e prekur është 2 vjeç. ISHP bën thirrje që vaksinimi i fëmijëve të vazhdojë sipas grupmoshave 1-5 vjeç.

“Instituti i Shëndetit Publik ju bën thirrje të gjithë prindërve të vaksinojnë fëmijët e tyre sipas kalendarit kombëtar të vaksinimit dhe udhëzimeve të ISHP-së për grupet që janë më të rrezikuara. Jo vetëm fëmijët, por edhe të rriturit që nuk janë vaksinuar ndaj fruthit apo nuk kanë marrë dy doza të vaksinës, duhet të vaksinohen. Vaksinimi ndaj fruthit është mbrojtja më e mirë për parandaluar fruthin dhe komplikacionet që vijnë prej tij. Për shkak se kjo periudhë e vitit sjell rritje të numrit të rasteve të infeksioneve respiratore dhe gripit, bëhet akoma më i rëndësishëm vaksinimi, për të parandaluar përhapjen e fruthit:, sqaron ISHP.