Ballina Aktualitet Lobimi i PD-së në SHBA, flet Vasili: Kushdo që shkel ligjin të...

Lobimi i PD-së në SHBA, flet Vasili: Kushdo që shkel ligjin të dënohet por të zbardhim çfarë ndodhi me kokainën

Kreu i grupit parlamentar të LSI-së, Petrit Vasili, në një komunikim me gazetarët kërkoi zbardhjen e çështjes për kapjen e 613 kg kokainë pak ditë më parë, në Maminas të Durrësit.

Vasili theksoi, se operacioni në fjalë do të marrë përgjigjen deri në fund si dhe u shpreh edhe për çështjen e lobimit të PD-së dhe një protestë të mundshme.

Mes të tjerash ai kërkoi sqarimin se pse kryeministri Edi Rama dhe ministrit i Brendshëm Fatmir Xhafaj ndajnë qëndrime të ndryshme për operacionin e kapjes se kokainës.

“Çështja e kokainës duhet të marrë hetimin e nevojshëm. Brenda ditës tjetër thotë kryeministri dhe tjetër thotë Xhafaj”, tha Vasili.

Në lidhje me çështjen e lobimit të PD-së, Vasili deklaroi se nuk e ka ndjekur fare dhe se është përqendruar e gjithë puna tek zbardhja e së vërtetës për 613 kg kokainë.

“Se kam ndjekur fare këtë çështje, jam këtu para jush sepse kam mbi dy javë por jo vetëm, sigurisht me një staf të kualifikuar, ekspertë të sigurisë e drejtësisë që po ndjekim hapat që po ndërmerren lidhur me tendencën për ta mbuluar, për kthyer në një ngjarje të zakonshme kapjen e 613 kg kokainë. Pa zbardhur këtë çështje, nuk më intereson asnjë çështje tjetër. Për gjithë çështjet e tjera, kushdo që ka probleme të shkojë në prokurorinë shqiptare. Kushdo që shkel ligjin të dënohet nga i pari tek i fundit. S’kam asnjë lloj ndjeshmërie, por t’i japim përgjigje patjetër kësaj gjëje. Në qoftë se kryeministri shqiptar që është fjalaman i deklaruar, i cili komenton edhe po ngordhi një mace në një fshat të Shqipërisë, nuk flet për 613 kg kokainë, nuk flet për administratën publike, e cila po shkatërrohet para syve të tij edhe me bekimin e tij, e nuk flet për koncesionet kur të tjerët i thonë ndal se po na rrënon ekonominë, të tjerat janë fjalë boshe”, deklaroi Vasili.

LEXO EDHE:  Dy vëllezërit nga Durrësi kërcënojnë sërish se do të hidhen nga pallati: Nga shtëpia do të dalim vetë të vdekur

Kreu i grupit parlamentar të LSI-së foli edhe për një marrëveshje parazgjedhore me PD-në, por tha se e gjithë vëmendja është përqendruar tek zbardhja e trafikut të 613 kg kokainë.
“Tani për momentin po bashkëpunojmë me PD-në, të zbardhim një për një çfarë është bërë më 613 kg kokainë, kjo është përpara gjithë gjërave të tjera. Të tjerat janë…”, tha Vasili.

Në lidhje me ndonjë protestë të mundshme të opozitës, Vasili deklaroi se do konsumojmë të gjithë instrumentet politikë. “Protesta është një veprim i zakonshëm jo i jashtëzakonshëm për një opozitë. Por një opozitë që bën vetëm protesta dhe nuk i hyn në mënyrë kapilare zbërthimit të mekanizmit kriminal që fsheh këtë gjë ajo nuk e ka bërë detyrën e saj”, theksoi Vasili.

Për të marrë lajmet e fundit të “DuaLajm.com”, ndiq edhe faqen tonë në Facebook