Festa me armë në vend, pavarësisht disa fushatave që janë bërë me vite nga Policia e Kosovës, nuk po ndalet. Për 24 orë në Kosovë, në komunat e Klinës e Gjakovës, janë arrestuar tre persona. Në të dy rastet pati gjuajtje me armë në aheng familjar.

Policia e Kosovës ka njoftuar se kanë arrestuar në Klinë, rreth orës 21:15 minuta një person, pasi ka shtënë me armë zjarri në dasmë. Të dyshuarit policia ia ka konfiskuar një armë dhe fishekë, derisa, pas intervistimit, është liruar në procedurë të rregullt.

“Është arrestuar i dyshuari mashkull, shqiptar pasi në një aheng familjar ka shtënë me armë zjarri. Nga i dyshuari është konfiskuar një armë zjarri me një fishek. Me vendim të prokurorit pas intervistimit i dyshuari është liruar dhe rasti shkon në procedurë të rregullt”, thuhet në raport.

Rasti tjetër, ndërkaq, ka ndodhur në Gjakovë. Policia ka njoftuar se ka arrestuar një person në këtë komunë, mbrëmë rreth orës 22:00, pasi kishte shtënë me armë zjarri në një aheng familjar. I janë konfiskuar 89 fishekë dhe 13 gëzhoja, derisa me vendim të prokurorit i dyshuari është liruar dhe rasti shkon në procedurë të rregullt.

“Është arrestuar i dyshuari mashkull shqiptar shtetas i huaj, pasi i njëjti në aheng familjar ka shtënë në ajër me armë zjarri. Arma me 89 fishekë dhe 13 gëzhoja janë konfiskuar. Me vendim të prokurorit pas intervistimit i dyshuari është liruar dhe rasti shkon në procedurë të rregullt”, shkruhet në njoftim të policisë.

Për përdorim të armës është arrestuar, ndërkaq, mbrëmë edhe një person në Podujevë. Siç ka njoftuar policia i janë konfiskuar dy fishekë dhe një revole. Rastet si ky i festimit me armë zjarri nuk janë të paktë, gati çdo ditë të tilla raportohen përmes Policisë së Kosovës në njoftimin 24-orësh.