Ballina Kryesore Marrëveshja e detit, shpërthen Nishani: Akti më i madh i tradhëtisë kombëtare...

Marrëveshja e detit, shpërthen Nishani: Akti më i madh i tradhëtisë kombëtare që nga 1912, i bëj thirrje Arta Markut…

Pas lajmit të dhënë nga mediat greke se është arritur marrëveshja e detit mes Shqipërisë dhe Greqisë, ka reaguar ashpër ish-Presidenti i Republikës, Bujar Nishani.

Përmes një postimi në “Facebook”, Nishani thekson se nëse lajmi i mediave greke është i vërtetë, kjo është tradhtia më e madhe kombëtare që prej vitit 1912.

Sipas Nishanit, nëse kjo gjë është arritur, do të nisë një konflikt mes dy vendeve, pasojat e të cilit do të ndiheshin në të gjithë rajonin.

Gjithashtu Nishani i bën thirrje Kryeprokurores së Përgjithshme të Përkohshme, Arta Marku që të ndërhyjë.

Reagimi i plotë i Nishanit

Të dashur miq !

Media greke njofton sot se Marrëveshja e Detit midis Shqiperisë dhe Greqisë është arritur midis dy qeverive përkatëse.

Me triumfalizëm dhe shumë e kënaqur media greke njofton se qeveria shqiptare i ka dorëzuar Greqisë zonat më të rëndësishme të ekskluzivitetit ekonomik.

Tashmë nuk përbën më sekret se zonat që i përkasin “de facto” Shqipërisë janë zotëruese të pasurive të mëdha të gazit dhe naftës.

Nëse lajmi i medias greke është i vërtetë ky akt i qeverisë aktuale shqiptare do të përbënte aktin më të lartë të tradhtisë kombëtare që nga themelimi i shtetit shqiptar në 1912.

Ky akt i padrejtë do të hapte një konflikt të ri e të panevojshëm historik midis dy vendeve me pasoja rajonale.

Me një arrogancë ekstreme Qeveria Shqiptare mban sekret marrëveshjen dhe nuk bën me dije asnjë informacion nga kjo marrveshje e negociuar dhe përfunduar sipas Minisrit të Jashtëm të Greqisë para pak kohësh dhe medias greke sot.

Së pari, nuk ka të deklaruar nëse Qeveria Shqiptare ka marrë “Autorizimin e Plotfuqishmërisë” nga Presidenti i Republikës ?

Deklaroj se deri më 24 korrik 2017 në Institucionin e Presidentit të Republikës nuk është paraqitur asnjë kërkesë nga Qeveria për “Plotfuqishmërinë” ndonëse tashmë shihet qartë se negociatat dhe bisedimet janë zhvilluar edhe përpara kësaj date. Nëse pas kësaj date ka një kërkesë dhe nëse kjo “Plotfuqishmëri” është dhënë apo jo, kjo mbetet për tu mësuar. Por, që pas Vendimit nr. 15, datë 15.04.2010 të Gjykatës Kushtetuese marrja e “Plotfuqishmërisë” për negocimin e Marrveshjes së Detit është detyrim ligjor. Mos zbatimi i këtij Vendimi të GjK përbën vepër të rëndë penale.

LEXO EDHE:  "12 milje det Greqisë", Bushati i përvishet ish-kryeministrit: Sali, je tërbuar! S'ke ç'i bën, shih hallet me drejtësinë e re

Citoj vendimin e Gjykatës Kushtetuese :

“26. Gjykata vlerëson se pretendimi i kërkuesit për mungesën e plotfuqisë së lëshuar nga Presidenti i Republikës për grupin negociator shqiptar gjatë bisedimeve dhe lidhjes së marrëveshjes për delimitimin e zonave detare midis Shqipërisë dhe Greqisë është i bazuar dhe duhet pranuar”.

Pra Gjykata thotë : “gjatë bisedimeve dhe lidhjes së marrëveshjes”.

Kërkoj publikisht si ish-President i Republikës, Prokurorit të Përgjithshëm të Republikës që të nis verifikimin ligjor kur kanë nisur negociatat dhe bisedimet, theksoj, “negociatat dhe bisedimet” për Marrveshjen e Detit dhe nëse gjatë këtyre bisedimeve është marrë “Plotfuqishmëria” sipas detyrimit të Vendimit të Gjykatës Kushtetuese.

Në këtë rast Prokurori i Përgjithshëm i Republikës dhe prokuroria shqiptare janë përpara një përgjegjësie të madhe ligjore kushtetuese mbi Sovranitetin e Shtetit.

I bëj thirrje opozitës shqiptare të kërkoj transparencë të plotë për të gjithë proçesin e negociatave dhe rezultatin e arritur për këtë çështje. Në këtë rast opozita ka një përgjegjësi historike.

Shpresoj shumë që media dhe intelektualët shqiptarë të mos heshtin në bashkëfajsi !

Për të marrë lajmet e fundit të “DuaLajm.com”, ndiq edhe faqen tonë në Facebook