Ballina Kryesore “Ringjallet” Kastriot Islami, ja mesazhi i fortë që ka për Ramën dhe...

“Ringjallet” Kastriot Islami, ja mesazhi i fortë që ka për Ramën dhe Rendin Kushtetues në Shqipëri

Ish-deputeti i Partisë Socialiste fillimisht, e më pas asaj demokrate, Kastriot Islami pas një kohe të gjatë mungesë në arenën politike, është rikthyer sot me një shkrim.

Islami bën një analizë rë sistemit gjyqësor në Shqipëri, ku ndër të tjera thekson se Shqipëria nuk është as vend demokratik, dhe as nuk ka shtet ligjor.

Nga Kastriot Islami
Shqipëria është pa Gjykatë Kushtetuese. Kjo mjafton për të nxjerrë përfundimin se Shqipëria nuk është as vend demokratik dhe as nuk ka shtet ligjor. Gjykata Kushtetuese, garantja e funksionimit të shtetit ligjor nuk ekziston më në Shqipëri.

Kjo situatë nuk duket e rastësishme. Shpërbërja e Gjykatës Kushtetuse duket e qëllimshme. Së pari kjo është bërë nga Rama për ta vënë edhe këtë gjykatë nën kontroll në të ardhmen. Dhe së dyti, deri në ngritjen e Gjykatës së re Kushtetuese, Rama, nga frika e ndëshkimit individual, ka programuar miratimin e disa ligjeve arbitrare e antikushtetuese që GJK do ti rrëzonte. Dhe së treti, në këtë situatë pa GJK, pra kur mungon arbitri i drejtësisë që do të pengonte veprimet arbitrare antikushtetuse, Rama ka programuar të grabisë pronën publike duke dhunuar të drejtat kushtetuese dhe duke menduar se do ti shpëtojë ndëshkimit.

Fatkeqësisht ky shkatërrim i sistemit kushtetues në Shqipëri është bërë ndërkohë që janë prezentë zyrtarë ndërkombëtarë të angazhuar për kryerjen e reformës në drejtësi. Një situatë e tillë nuk ka ndodhur në asnjë vend tjetër demokratik në botë dhe asnjëherë tjetër në këto 27 vjet në Shqipëri. Kjo heshtje ka shtyrë shumë analistë të mendojnë se këta përfaqësues ndërkombëtarë

  • ose janë bashkëautorë e për rrjedhojë bashkëfajtorë;
  • ose konsiderojnë Shqipërinë një fshat periferik të Europës që nuk meriton më shumë se qytetarët e paralizuar janë nënshtruar dhe nuk reagojnë kundër së keqes;
  • ose janë të kompromentuar.

Arsyet që vendi ka rrëshqitur në një gjëndje të tillë janë të shumta:

  • Është paaftësia e papërgjegjshmëria e Ramës dhe e maxhorancës së drejtuar prej tij;
  • Është drejtimi i vendit nga Rama me arrogancë e në mënyrë autoritare, korruptive, arbitrare,
  • Është vënia nga Rama nën kontroll e të gjithë insititucioneve kushtetuese dhe shpërbërja e GJK;
  • Është mungesa e fuqisë së opozitës për ta ndalur deritani veprimet arbitrare të Ramës;
  • Është paraliza e veprimit qytetar nga varfëria, papunësia dhe mungesa e shpresës;
  • Është heshtja e pashëmbullt e zyrtarëve ndërkombëtarë.

Shqipëria pa GJK është në prag të greminës e të kaosit sepse shteti ligjor ka rënë. Miratimi i ligjeve arbitrare me kartonat e një maxhorance të papërgjegjshme dhe pamundësia për ti atakuar to në GJK kanë plagosur rëndë demokracinë dhe pluralizmin.

Në Shqipëri të gjithë janë të rrezikuar, edhe shqiptarët edhe ndërkombëtarët se nuk kë më shtet ligjor. Gjithkujt, individ, biznes apo përfaqësues i medias a shoqërisë civile, shqiptar apo ndërkombëtar, mundi ti ndodhë gjithçka e tmerrshme sepse mungon mekanizmi i frenimit, i korrigjimit, dhe i mbrojtjes nga dhunimet e të drejtave themelore dhe i garantimit të sigurisë juridike që është Gjykata Kushtetuese.

Konkretisht, Rama mund të kalojë çfarëdo ligji që i thotë mëndja e tij e çoroditur, ndërkohë që opozita nuk zotëron asnjë mekanizëm institucional për ta ndalur atë.

Kushtetuta tashmë është një copë letër pa vlerë se mungon GJK që ka për detyrë të respektojë zbatimin e saj.

Pratikisht vendi është në kushtet e mungesës së rendit kushtetues. Kaosi mund të ndodhë në cdo moment dhe vendi mund të destablizohet nga përplasjet mes qytetarëve e qeverisë, mes qytetarëve e maxhorancës, mes qytetarëve e pushtetit vendor, sepse nuk ka një “mekanizëm të pavarur gjykimi e moderimi” që e ndalon këtë proces destabilizimi.

Në cdo moment mund të vendoset një diktaturë e egër gjakatare. Sigurisht që kjo situatë është ideuar dhe orkestruar nga Rama vetëm për interesa të pushtetit të ngushtë të karriges së tij…

Nëse gjendja nuk ndryshon, gjasat janë që ajo të precipitojë në mënyrë të paparashikueshme.

Për të marrë lajmet e fundit të “DuaLajm.com”, ndiq edhe faqen tonë në Facebook