Ballina Kryesore Robert Ndrenika i lënduar: Rama më bëri atë që s’ma ka bërë...

Robert Ndrenika i lënduar: Rama më bëri atë që s’ma ka bërë njeri, më turpëroi para kolegëve

I ftuar në emisionin “Studio e Hapur” në News24, artisti i popullit Robert Ndrenika është shprehur se është ndier shumë i lënduar nga kryeministri Rama, kur nuk pranoi t’i jepte fjalën gjatë një takimi me artistët për çështjen e Teatrit Kombëtar.

Aktori i madh Ndrenika tha se kreu i qeverisë “e turpëroi para kolegëve”, dhe se kjo gjë ishte tepër e rëndë për të.

“Nuk na përfill ne. E bën me fodullëk, me mendjemadhësi. Mendoj se ai i shkel me këtë, edhe atë ministreshën që ka aty. Kë nuk ka fyer ai. Artistë të tjerë, mua. Hajde të ballafaqohemi, të ulemi të flasim. Ai grabitjen po e motivon me ligj, me parlament, që të justifikohen për grabitjen që duan të bëjnë. Sa i takon Teatrit ai e ka historinë e vet. Sa i takon ndërtesës duhet të flasin ekspertët”, tha ndër të tjera Ndrenika.

Në një takim që patët me kryeministrit Rama, ai nuk ju dha fjalën. A u ndihet i lënduar?
Natyrisht që jam ndjerë jashtëzakonisht i lënduar, atë që ma ka bërë ai njeri, nuk ma ka bërë njeri deri më sot. Me turpëroi para kolegëve te mi, dhe 100 vetëve që ishin aty. Ishte shumë e rëndë për mua.

Nëse do e kishit përballë çfarë do i thonit?
Kam për të thënë diçka, por jo personalisht për atë, por për çështjen e Teatrit. Kryeministrat venë e vinë. Ky vend ka pasur edhe kryeministër 30-vjeçar, e pati atë që pësoi. Jam i sigurte që edhe ky nuk është kryeministër i përjetshëm”.

Jeni i dëshpëruar për shembjen teatrit?
Shumë i dëshpëruar jam. Është njësoj si t’i bihet murit me kokë. Është shumë e rëndë. Ai vend aty është shumë i shenjtë. Aty është krijuar gjithë kultura e kryeqytetit. Është shumë e rëndë mënyra si bëhet kjo punë. Kërkon ai ambasadori i madh i amerikanëve të kapë peshqit e mëdhenj që i ka para syve, edhe kapen këto sardelet. Aty ka 20 vjet që tentohet të kryhet një grabitje e mbetur në tentative dhe nuk flet njeri. As prokuroria, as qeveria, as PS. Me sa duket ai do ta bëjë këtë punë. Dhe kur i del, le t’i dalë.

Pse nuk e dëgjon zërin tuaj kryeministri?
Nuk na përfill ne. E bën me fodullëk, me mendjemadhësi. Mendoj se ai i shkel me këtë, edhe atë ministreshën që ka aty. Kë nuk ka fyer ai. Artistë të tjerë, mua. Hajde të ballafaqohemi, të ulemi të flasim. Ai grabitjen po e motivon me ligj, me parlament, që të justifikohen për grabitjen që duan të bëjnë. Sa i takon Teatrit ai e ka historinë e vet. Sa i takon ndërtesës duhet të flasin ekspertët. Mund të bëhet edhe kjo godinë, kështu si është. Me 10 mln euro mund të bëhet një teatër i shkëlqyer, dhe Tirana e meriton këtë gjë. Ka shumë mungesë transparence. Duhet të ulemi të bisedojmë, por me palë të tretë.

Ta sqarojmë pozicionin tuaj, ju jeni kundër shembjes së Teatrit, por jeni kundër projektit të ri?
Projekti i ri mund të bëhet transparent sepse nuk na kanë informuar. Nëse një teatër është 4/4 prej kësaj një pjesë e madhe është skena. Edhe ky teatër mund të rregullohet dhe nuk kërkon shumë fonde. Mund të bëhet edhe një teatër se e meriton kjo Tiranë. Pse nuk shohim Shkupin, Sofjen. Zagrebin. Lere më pastaj Londrën apo vende të tjera si janë teatrot kombëtare. Edhe Delvina ka një sallë të mirë, por është turp që Tirana të mos ketë një Teatër të mirë. Kjo është një grabitje e mbetur në tentativë. Duhet të hetojë Prokuroria.

Ju si mendoni, kush janë arsyet që ka një lloj armiqësie të kryeministrit me artistët?
Nuk e di… Ndoshta ka qenë vetë i pa talentuar dhe mbase do që të marrë hak. Tani thonë se është bërë milioner ai. Si u bë milioner për 20 vite?.

Keni kërkuar ju një takim me Ramën?
Na thirri në kryeministri dhe foli vetë se neve na preu gjuhën. Pas atij takimi nuk kemi pasur asnjë takim tjetër. Tek presidenti kam qenë vetë dhe na priti shumë mirë.

Ju çfarë do bëni nëse pr.ligji merr votat në Kuvend?
Çfarë të them… murit me kokë nuk i bie dot. Unë fjalën time do ta them, pastaj si të duan le të bëjnë. Ma do mendja se edhe populli është me mendimin tim sepse me pyesin kur dal në rrugë.

Thirrja që keni sot, mbase dhe për deputetet se ata do e votojnë?
Thirrja është që Teatrin duhet ta bëjë shteti dhe jo PPP, pasi kjo është një hile dhe bie era abuzim.

Për të marrë lajmet e fundit të “DuaLajm.com”, ndiq edhe faqen tonë në Facebook