Ballina Kryesore Shkarkimi i 8 drejtorëve të burgjeve, reagon Patozi: Si i kanë ngjitur...

Shkarkimi i 8 drejtorëve të burgjeve, reagon Patozi: Si i kanë ngjitur shkallët e karrierës në administratë këta të “riedukuar”

Pas vendimit të Ministrisë së Drejtësisë për shkarkimin e 8 drejtorëve të burgjeve në vend për shpërdorim detyre, ka ardhur dhe reagimi i ish-deputetit demokrat, Astrit Patozi.

Përmes një statusi në faqen e tij në “Facebook”, duke ironizuar vendimin e Ministrisë së Drejtësisë, Patozi shprehet se gjysma e drejtorëve në Shqipëri paskan qenë të dënuar më parë.

Patozi thekson se Ministria e Drejtësisë nuk ka dhënë asnjë shpjegim se si i kanë ngjitur shkallët e karrierës në administratë këta të “riedukuar”.

Statusi i Patozit
TA KESH DREJTORIN SHOK BURGU
Po ne i paskemi pasur të dënuar vetë më parë gjysmën e drejtorëve të burgjeve në Shqipëri!
Sihariqin na e dha vetë ministrja e re e Drejtësisë, por pa na shpjeguar se si i kanë ngjitur shkallët e karrierës në administratë gjithë këta të riedukuar.
Mbase ka qenë kriter i qeverisë së “Rilindjes” që eksperienca personale të ndihmon në zbatimin me korrektesë të detyrës.
Që ata janë kthyer me qejf në vendin, që e njihnin më mirë se kushdo tjetër, kjo kuptohet lehtë, por kush na e bëri këtë “nder” për të zbukuruar burgjet tona, këtë ministrja nuk na e tha.
I bie që shumë kriminelë dhe trafikantë të kenë gjetur drejtor burgu shokun e vjetër të bandës, kur kanë rënë brenda. Dhe nuk është çudi që ata të jenë ndjerë më të sigurt prapa hekurave, sesa po të ishin të lirë, ku mund t’i gjente jo edhe aq rastësisht ndonjë plumb “qorr” i rivalëve të rrugës.
Dhe thonë pastaj që këta nuk po bëjnë shtet.

Për të marrë lajmet e fundit të “DuaLajm.com”, ndiq edhe faqen tonë në Facebook