Ballina Kryesore Zgjedhja e Ruçit kryetar Kuvendi me votat e PD, reagon ashpër Basha:...

Zgjedhja e Ruçit kryetar Kuvendi me votat e PD, reagon ashpër Basha: E turpshme! Ai është…

Pas zgjedhjes së Gramoz Ruçit me 80 vota pro si kryetar i ri i parlamentit, dy prej të cilave nga opozita, LSI dhe PD lanë sallën e Kuvendit duke u larguar.

Në një prononcim të shkurtër për mediat, ka reaguar dhe kryetari i Partisë Demokratike, i cili ishte pranë të përndjekurve politikë që po protestonin jashtë.

Basha deklaroi se është e turpshme që Gramoz Ruçi të zgjidhet në krye të parlamentit, duke e akuzuar atë si përgjegjës për masakrën e 2 prillit të vitit 1991 në Shkodër.

“Është e turpshme të zgjidhet Gramoz Ruçi në krye të parlamentit. Ai është përgjegjës për masakrën e 2 prillit dhe 4 viktimat e pafajshme. Ruçi pinjoll i diktaturës! Zgjedhjet u fituan në aleancë me krimin: Në këtë ditë, ku së bashku me nderimin e martirëve të Postribës mblidhemi jo vetëm për të vendosur së bashku, por edhe për të luftuar së bashku që e djeshme të mos kthehet më kurrë si e nesërmja”, deklaroi Basha.

Duke shprehur mbështjetjen ndaj protestuesve Basha tha se PD do të jetë në krahun e tyre.

“Do jemi në krahun tuaj dhe vlerat që përfaqësoni. Do jemi çdo ditë me qytetarët dhe kundër krimit e korrupsionit”, deklaroi ai.