Ballina Galeri FOTO/ U përzgjodh mes “100 Fshatrave Turistikë”, njihuni me fshatin disa hapa...

FOTO/ U përzgjodh mes “100 Fshatrave Turistikë”, njihuni me fshatin disa hapa larg Dardhës

Nga Ernest Braholli
Pranvera e mbulon me petale lulesh, Vera me gjelbërimin e pemëve, Vjeshta me arin e gjetheve, ndërsa Dimri e struk bukur mes bardhësisë së dëborës.

Bëhet fjalë për Arrzën, një fshat vetëm 5 km larg nga Dardha, i cili është përzgjedhur për t’u përfshirë në programin zhvillimor të 100 fshatrave të Shqipërisë për turizëm rural.

Arrëza është pjesë e nën-rajonit etnografik të quajtur Devolli i Sipërm, sëbashku me Dardhën, Sinicën, Qytezën dhe Nikolicën. Me Nikolicën që ndodhet rrëzë Malit të Gramozit, gjithashtu e përzgjedhur në program, Arrëza lidhet përmes luginës së Lumit Devoll, i cili e ndan fshatin në dy pjesë.

Fshati është një vendbanim i hershëm, rreth 600-vjecar, me tradita të forta kulinarie të përpunimit artizanal të produkteve bujqësore dhe blegtorale, duke i shtuar kështu potencialin turistik. Shtëpitë e ndërtuara mahnitshëm në strehë të njëra-tjetrës mbajnë ende në këmbë traditën, zakonet apo legjendat e vjetra, të shkruara nëpër gurë të gdhendur, oborre të shtruara mirë dhe sokakë të gjerë.

Fshati ka në inventar dy objekte kulti dhe një Monument Natyre, Dobërgorën. Dobërgora, emri i së cilës përkthehet “Mali i Mirë”, është një vend pelegrinazhi i njohur në zone. E cilësuar si vend i mrekullive, ajo ka në përbërje drurë lisi dhe ahu me moshë 157 vjecare, dhe lartesi nga 18 deri 20 metra, duke përbërë një shesh pushimi të përkryer.

Zona është e pasur me burime të shumta ujore, lugina të gjelbëruara, shumëllojshmëri drurësh dhe pemësh të egra frutore (lajthi, dardha, qershi), si dhe një biokorridor i rëndësishëm për rruazorët e mëdhenj si ariu , ujku , rrëqebulli (Felis lynx), dhia egër, kaprolli, etj.

Ndërkohë qe fshatrat malorë vitet e fundit janë boshatisur nga lëvizjet e banorëve drejt qëndrave të mëdha, Arrëza vazhdon të numërojë rreth 600 banorë, të cilët kryejnë aktivitet bujqësor dhe blegtoral në funksion të agroturizmit.

LEXO EDHE:  Kokaina në port/ Hetohen imtësisht edhe 2 kontenierë të "Arbri-Garden", zbulohet lidhja e kreut të firmës me Tahirin

Për më tepër ju ftojmë të shfletoni galerinë e mëposhtme të fotove:

Për të marrë lajmet e fundit të “DuaLajm.com”, ndiq edhe faqen tonë në Facebook