Ballina Politike Meta shpërthen ashpër ndaj Ramës: “S’bëhesh i fortë duke pirë doping”. Akuzon...

Meta shpërthen ashpër ndaj Ramës: “S’bëhesh i fortë duke pirë doping”. Akuzon dhe Blendi Klosin si kumarxhi

Presidenti i zgjedhur, Ilir Meta ka shpërthyer sot nga Berati në akuza mjaft të ashpra ndaj kryeministrit, Edi Rama, të cilit i përmendi dopingun, duke mos kursyer as kreun e listës së PS-së për Qarkun, Blendi Klosi, që e cilësoi si një kumarxhi.

Ai tha se Rama, të cilit iu referua si “ish-bashkëkryetari” zgjodhi vendin e gabuar (Beratin) për t’i shpallur luftë LSI-së me shpifje sipas tij të shëmtuara dhe të papranueshme.

Meta tha se në Berat ka pasur harmoni mes PS-LSI por prej tre muajsh në krye të grupit të punës erdhi një kumarxhi që iu bën presion njerëzve, referuar Blendi Klosit.

“Kë grua socialiste ka hequr LSI këtu në Berat, Arta Daden apo Valentina Leskaj, apo shumë e shumë gra me kontribute të çmuara për t’i zëvendësuar me biznesmenë? Nuk i heq LSI-ja gratë socialiste por ish-bashkëkryetari im zgjodhi vendin më të gabuar, Beratin për të hapur luftë me LSI-në me shpifje nga më të shëmtuara dhe më të papranueshmet. Berati e di shumë mirë se ka pasur një harmoni të shkëlqyer gjatë këtyre viteve mes PS- LSI por prej tre muajsh në krye të grupit të punës ka ardhur një kumarxhi dhe ju bën presion njerëzve që të mos shkojnë me LSI-në. E di Berati dhe ndaj do votoj për LSI-në sepse kjo është partia e socialistëve dhe jo oligarkëve. Nuk ka patur gjunjë as Berisha i parë për të nënshtruar popullin e Beratit e jo më të kenë gjunjë këta që nuk mbajnë dot as ekuilibrin e tyre e jo më të trembin Beratin, Kuçovën, Skraparin. Kur njeriu pi doping kujton se është i fortë, por kur t’i dalë dopingu do i kërkojë falje Petrit Vasilit. LSI e ka fuqinë tek rinia e Beratit dhe gjithë Shqipërisë. Rinia e ka vendosur forcë të parë”, theksoi Meta.