Elisa Spiropali, ministrja e Shtetit për Marrëdhëniet me Parlamentin reagoi në lidhje me protestën e sotme të opozitës, nga foltorja e Kuvendit.

Ajo tha se opozita nuk ka kursyer për asnjë moment ‘bojën e zezë” ndaj Policisë së Shtetit.

“Vetëm në 2 muajt e parë të 2019 kemi 60 raste të referuara për pastrim parash dhe 8.2 milionë euro të sekuestruara. Ndërsa në kohën e opozitës gjithsej u sekuestruan 1.2 milionë euro, kur 1 milionë euro forca e ligjit i ka sekuestruar në një goditje të vetme. Ndryshimi është i qartë. Në 5 vite e gjysmë opozita nuk ka lënë rast pa hedhur bojë të zezë në mënyrë sistematike dhe të llogaritur mirë për të cënuar besueshmërinë e një prej shtyllave të shtetit, që është Policia e Shtetit. Me qindra e mijëra deklarata shtypi, qindra emisione televizive, deputetë të opozitës të dirigjuar për të goditur Policinë e Shtetit, telenovela me Babale e me drogë, që janë skenare të mirëmenduar për të shkatërruar moralin e Policisë së Shtetit dhe për t’i bërë një dëm të rëndë vendit. Ky vend ka policë të vrarë, nuk ka gjykatës e prokurorë të vrarë. Opozita nuk e ka pasur me ministrat e Brendshëm të PS-së, por e ka pasur dhe e ka me cenimin e sigurisë dhe stabilitetit në vend. Më parë punonin si ngastra të pavarura, sepse drejtoheshin nga klane të caktuara. Në më pak se 1 vit e gjysmë janë organizuar 24 operacione të profilit të lartë me arrestimin e 280 të dyshuarve për përfshirje në grupe kriminale. 14 grupe kriminale janë goditur dhe 27 milionë euro të dyshuara me prejardhje të paligjshme u janë hequr kriminelëve”, tha Spiropali.