Situata e studentëve në ditën e tyre të pestë të protestës ka agravuar me dhunë dhe shkelma ndaj pedagogut Jani Marka, përfaqësues i Lëvizjes për Universitetin. 

Sapo Marka ka marrë megafonin dhe ka nisur të flasë gjendje tensioni u krijua në turmën e studentëve të cilët me forcë arritën ta largonin pedagogun nga protesta e tyre, duke e quajtur atë si një njeri të politizuar, që kish ardhur në protestë pikërisht për ti përçarë ato. 

Në një  prononcim për mediat pedagogu Marka është shprehur tepër i revoltuar duke thënë se ai nuk e meritonte t’i ndodhte ajo situatë me studentët pasi ai ishte aty për t’i mbështetur dhe jo përçarë ato. Madje Marka ka vazhduar më tej duke akuzuar kryetarin e opozitës zotin Lulzim Basha se ka sjellë eksponentë të dhunshëm në protestë dhe duhet t’i tërheqë ato.  

Fill pas këtyre momenteve tensionuese në protestën e studentëve ka reagur përmes një satusi në Facebook Lëvizja për Universitetin duke denoncuar dhunën e ushtruar ndaj pedagogut.  

Në status thuhet :

Lëvizja Për Universitetin denoncon dhunën e ushtruar nga rrugaçët partiakë!

“Sot, për të tretën ditë radhazi, studentë dhe veprimtarë të Lëvizjes Për Universitetin janë sulmuar fizikisht, kërcënuar dhe ofenduar nga rrugaçë partiakë. Goditje me çelësa, tërheqje nga flokët, shkelma, shuplaka dhe grushte, janë format kryesore të dhunës me të cilat të rinjtë janë përballur.

Të paktën 12 raste sulmesh të tilla nga keqbërës të partive janë evidentuar gjatë këtyre ditëve, prej të cilave, shumica e të cenuarve kanë qenë vajza. Në pjesën më të madhe të këtyre rasteve, agresorët kanë qenë të forumeve të Partisë Demokratike. U bëjmë thirrje strukturave drejtuese të PD-së, si dhe kryetarit Lulzim Basha, që të tërhiqen nga aktet e dhunës dhe metodat e tjera që synojnë intimidim dhe përçarje.
E njëjta thirrje vlen edhe për drejtuesit e partive të tjera, për të ndalur dhe për t’u distancuar nga çdo formë dhune apo presioni. Në fakt, studentët në protestë para Ministrisë së Arsimit po përballen me një fushatë të koordinuar dezinformimi dhe orvatjesh për t’i përçarë.
Lëvizja Për Universitetin u bën thirrje të gjitha partive politike që të ndalin veprimet përçarëse ndaj studentëve. Edhe më fort se nga ne, thirrja për mospërfshirjen e partive vjen nga mijëra studentë njëzëri. Janë ata që e kanë kuptuar se partitë kanë vetëm një interes: përçarjen e studentëve dhe instrumentalizimin e protestës për agjendat e tyre.

LEXO EDHE:  Ditmir Bushati: Protesta e studentëve fat për Shqipërinë.

Përmes shpifjeve të përhapura nga disa kanale dhe në disa nivele është tentuar të përhapet edhe gënjeshtra sikur Lëvizja ka penguar protestues të “Astirit” që t’u bashkoheshin protestës. Jo vetëm që kjo gënjeshtër u zbulua nga mungesa e fakteve që lidhin studentët e Lëvizjes me rastin në fjalë, por edhe vetë akuzuesit kanë pretenduar më vonë përmes fotove se bëhej fjalë për ndonjë veprimtar partiak që nuk e lidh asgjë me ne.
Gjithashtu, dënojmë çdo akt dhune apo nxitje për dhunë nga militantët e partive. Këto dy ditë, studentë të Lëvizjes, vajza dhe djem, janë bërë objekt i një sërë sulmesh fizike nga rrugaçë partish politike. Mbrojtja jonë e vetme ka qenë masa studentore që në çdo tentativë na ka dalë në krah”.