Real Madridi fitoi bindshëm në Camp Nou ndaj Barcelonës me rezultatin 3-1, duke hedhur një hap më se të sigurt ndaj marrjes së trofeut të parë, Superkupës së Spanjës, në finalen e parë, por pritet dhe ndeshja e kthimit në Bernabeu.
Pjesa e parë e ndeshjes ka qenë me pak mundësi shënimi nga të dy rivalët e përjetshëm dhe u mbyll me rrjeta të paprekura.
Ka qenë fillimi i pjesës së dytë, në minutën e 50-të, ku Gerard Pique duke dashur të largojë topin nga zona realizoi një autogol, cili i dha avantazhin Los Blancos.
Pa kaluar katër minuta, madrilenët kishin mundësinë të shënonin një tjetër gol, me anë të Dani Carvajal, por Jordi Alba largoi topin nga vija e portës.
Në minutën e 74-të, Barcelona ishte shumë afër barazimit, por Sergio Busquets nga më pak se 10 metra e dërgoi topin mbi traversë.
Në minutën e 75-të, Messi pati rast ideal, por nuk ia doli. Pas një minute Luis Suarez u pengua nga portieri Navas dhe gjyqtari akordoi 11 metërsh, që u shndërrua në gol nga Messi.
Nuk zgjati shumë gëzimi dhe madrilenët sërish kaluan në epërsi. Cristiano Ronaldo, me mjeshtëri nga rreth 15-16 metra shënoi golin e dytë për Realin, kur kishin mbetur edhe 10 minuta nga koha e rregullt.
Në minutën e 82-të, portugezi u ndëshkua me karton të kuq për shkak të një simulimi brenda zonës, duke tentuar të fitojë një penallti.
Reali edhe pse me një lojtar me pak, thelloi fitoren në 1:3 falë Marco Asensios, i cili nga rreth 14-15 metra me një gjuajtje të jashtëzakonshme potente vulosin fitoren për Los Blancos, duke i ngrirë buzëqeshjen tifozëve të Barcelonës.
Por ende nuk ka mbaruar asgjë, edhe pse madrilenët janë shumë të favorizuar, pasi Barcelona shpreson të realizojë përmbysjen e madhe në “Bernabeu”.
