Kryetarja e Lëvizjes Socialiste për Integrim Monika Kryemadhi ka zhvilluar pasditen e sotme një takim me të rinjtë e forumit rinor në njësinë nr 2 në Tiranë.

Gjatë fjalës së saj në takim Kryemadhi është shprehur e bindur se sipas saj në fund të muajit Maj do të ketë zgjedhje të parakohshme.

Ndër të tjera Kryemadhi i ka kërkuar të rinjve që të sensibilizojnë qytetarët dhe t’i flasin për LSI, sepse sipas saj ka ardhur koha që shqiptarët t’i thonë JO krimit të organizuar me në krye Edi Ramën.

Deklarata e plotë e Monika Kryemadhit

“Të jeni të bindur që 94% e shqiptarëve meqë flitet për sondazhet dhe po jua them unë që bëjmë dhe ne sondazhe dhe i bëjmë sondazhet shumë të mira. 94% e shqiptarëve mendojnë që Shqipëria është më e varfër se ç’ka qenë. 94% e shqiptarëve besojnë që jeta e tyre është më e shtrenjtë se ç’ka qenë, çka do të thotë se dhe socialistët edhe ata që nuk votojnë kurrë, mendojnë si ne. Prandaj detyra juaj është që t’i zgjojmë, t’i sensibilizojmë, t’u flasim për LSI. Që jemi një forcë politike dhe parti politike e të rinjve dhe të rejave.

Njerëzit e kanë perceptimin shumë të mirë për LSI-në. Njerëzit e kanë perceptimin shumë të mirë për ta ndryshuar këtë realitet. Tashmë duhet të bëhemi gati që njerëzit ti çojmë në kutitë e votimit ditën e zgjedhjeve që do të jenë në fund të majit, sepse jam e bindur që zgjedhjet e përgjithshme parlamentare do të jenë të parakohshme.  Sepse në radhë të parë do të jenë socialistët ata që do ta vendosin në cep Edi Ramën dhe në radhë të dytë do të jetë e gjithë shoqëria shqiptare që do ti thotë JO krimit të organizuar që ka marrë në dorë fatet e fëmijëve të shqiptarëve. Prandaj që nga ky moment mos hezitoni më. Çdo ditë e më shumë që zvarritet pushteti i kalbëzuar i Edi Ramës aq më shumë kalbëzohet dhe aq më i pafuqishëm bëhet. Prandaj terreni është i juaji, hapësirat janë tuajat, mos ndaloni”,- deklaroi Monika Kryemadhi.