Ish-kryeministri dhe ish-lideri historik i PD Sali Berisha ka qenë i pranishëm në mbledhjen e opozitës të zhvilluar pasditen e sotme në Shkodër, ndërsa paralelisht në Tiranë zhvillohej seanca hapëse e sesionit të ri parlamentar, ku opozita nuk mori pjesë.

Teksa hodhi akuza mbi qeverinë, kryeministrin Rama dhe ministrin Xhafaj, Berisha ripërsëriti thirrjet drejtuar shqiptarëve për rrëzimin e qeverisë.

“Ai është vetëm një skizofren bipolar, të cilit poli i paranojës i thotë ata janë të këqinj se na rritën statistikën paçka se janë të pafajshëm. Mund të sillje në atë mënyrë. Pse policia nuk përballet me bandat që terrorizojnë Shkodrën, Elbasanin, Vlorën? Së pari është e kanabizuar. Së dyti si mund të përballet qeveria me bandat kur ministri është vëllau i kryebanditit të Vlorës, kur kryeministri flet gjithë ditën me bandat në telefon. Pse kryeministri flet në telefon me to?Ai është mbështetësi i tyre. Ndaj dhe thirrja është për qytetarët: Ta rrëzojmë qeverinë me çdo çmim. Kur vjen problemi, çdo durim ka një kufi, çdo çmim është i leverdisshëm për të çliruar shqiptarët nga ky regjim që po i shfarros dhe po i degdis nëpër botë dhe po i shtyp e poshtëron njëlloj si në diktaturë”, u shpreh Berisha.