Erion Veliaj, kryetari i Bashkisë së Tiranës, ka paditur në Gjykatë kreun e PD-së Lulzim Bashën dhe deputeten demokrate Jorida Tabaku për shkelje për lejet e ndërtimit kur ushtronin funksionin e kryetarit dhe nënkryetares në Bashkinë e Tiranës.

Veliaj ka paditur Bashën dhe Tabakun për shpifje lidhur me devijimin e rrjedhës së lumit të Lanës dhe projektit të Unazës së Re. Veliaj i cilëson akuzat tërësisht të pavërteta dhe pa asnjë provë.

Duke u bazuar te padia, kryebashkiaku Veliaj kërkon detyrimin që të paditurit të shpërblejnë dëmin jo pasuror shkaktuar ndaj tij me deklaratat publike të ditëve të fundit në shumën 100.000 mijë lekë, si dhe shpenzimet gjyqësore dhe ato avokatore.

Bashkia e Tiranës i ka përgënjeshtruar disa herë deklaratat e çiftit Basha-Tabaku lidhur me projektin në fjalë, duke theksuar se nuk ka miratuar asnjë leje ndërtimi në atë zonë.

“E paditura ka shpifur publikisht kur deklaron ngjarje dhe fakte tërësisht të pavërteta. Nga momenti i deklarimeve publike të së paditurës dhe deri më datën që po depozitohet kjo kërkesë padi, nga Bashkia e Tiranës dhe paditësi, kryetari i Bashkisë, Erion Veliaj nuk ka dhe nuk është miratuar asnjë leje ndërtimi në favor të subjektit që përfaqësohet nga zoti Edmond Bego.

Ndaj deklarimet publike të të paditurës janë deklarata që bazohen në shpifje dhe fyerje të paditësit, për shkak të funksionit që ai kryen si Kryetar i Bashkisë Tiranë”, thuhet në padi.

LEXO EDHE:  Takimi me ambasadorin Lu, Basha i përmend dy emra të njohur: Duhet të përfundojnë përpara Drejtësisë, përndryshe...

Në padinë drejtuar Gjykatës së Tiranës, Veliaj thotë se asnjë prej deklarimeve së të Tabakut nuk është i vërtetë. 

Këto deklarime janë të mbështetura në fakte dhe rrethana të rreme. Veliaj thekson se projekti i pretenduar, nuk është pjesë e projektit të Unazës së Madhe, por pjesë e zgjatimit të lumit të Lanës.

“Për sa kohë asnjë fakt nga të sipërpërmendurit nuk ka dalë apo të jetë provuar, atëherë kemi të bëjmë me shpifje dhe fyerje ndaj paditësit”, thuhet në padinë e Veliajt.

Ndërkohë kryebashkiaku i Tiranës ka premtuar se lekët që do të fitojë nga çdo vendim që gjykatat do të japin kundër shpifjeve publike, do të shkojnë direkt në “Fondin e Edukimit”, i krijuar për të mbështetur çerdhet, kopshtet, bibliotekat e shkollave, nxënësit e mirë të çdo komuniteti, me libra, kompjutera apo materiale mësimore.