Gjykata e Krimeve të Rënda ka dhënë sot vendimin për Fadil Kasëmin. Gjykata ka vendosur burg përjetë për Kasëmin i cili vrau ish bashkëshorten e tij gjyqtare Fildez Hafizi më 31 gusht të vitit 2017.

Vendimi është dhënë pak minuta më parë, pas një procesi që ka zgjatur për rreth një vit e gjysmë. Kasëmi është gjetur fajtor për të treja akuzat që janë: Armëmbajtje pa leje, vrasje me dashje dhe rrëmbim personi.

Mbrojtja pretendoi se organi i akuzës ka dhënë vetëm një akuzë copy paste, duke mos argumentuar për motivet e vrasjes. Seanca për dhënien e vendimit ishte caktuar më 8 janar por u shty pasi pala mbrojtëse kërkoi më shumë kohë për të këqyrur dosjen.
Më 27 dhjetor Prokuroria e Krimeve të Rënda dha pretencën për Kasëmin i cili vrau gjyqtaren Fildez Hafizi.

Ndërkohë vetë Kasëmi ka kërkuar falje, ndërsa shton se të parëve që iu kërkon ndjesë janë fëmijët e tij.

“Jam i penduar, kërkoj drejtësi. I kërkoj falje fëmijëve të mi dhe nuk dua falje nga ata. Dua vetëm të pranojnë ndihma financiare nga hallat dhe xhajat e tyre”, është shprehur Kasëmi.

Kasëmi dhe më herët ka pretenduar se ai ka dhënë kountribut për shkollimin e Hafizit, që më pas i është hedhur poshtë nga ish-bashkëshortja.

“Për shkollën e magjistraturës e kam financuar unë edhe pse e kam bërë në një mënyrë jo të ndershme dhe jo ligjore. Deri para magjistraturës marrëdhëniet tona kanë qenë shumë të mira. Më pas filloi të më thoshte shprehje që nuk i kuptoja.

Më mbyllte telefonin, më thoshte si do fëmijët, më thoshte që kaq të urtë jeni si vëllezër të gjithë, ke ndonjë armë të fshehur diku. Një ditë pashë vjehrrën që mblidhte fotot e fëmijëve dhe Fildezit dhe më ka bërë përshtypje. Bënim nga një muaj pushime dhe së bashku me prindërit e saj, që i kisha me vehte. U kam paguar qeranë për 15 vite dhe asnjëherë s’jam interesuar sa e ka pasur gruaja ime rrogën. Më 13 shkurt 2015 i kam thënë Fildezes se ku do shkojmë për 14 shkurtin të festojmë. Më tha që do dal me një shoqe se më ka blere nje shall,por unë i thashë mos është gjë lesbike shoqja. Më 2 mars 2015 më tha do iki tek babai duke më thënë çfarë do bëjmë se kështu nuk shtyhet. U zgjuan fëmijët dhe unë ika. E mora në telefon dhe i thashë prit të vij. Ajo kishte marrë një person dhe filloi të nxirrte rrobat jashtë duke më thënë se do iki tek babai. Fejesën e Fildezes me mua e kam financuar unë. Financimin e saj dhe emërimin në punë si edukatore dhe si drejtoreshë kopshti e kam financuar unë”,deklaronte Kasëmi në një nga seancat gjyqësore.