Disa persona të paindentifikuar i kanë vënë flakën makinës së avokates në Tiranë.

Automjeti tip “Mercedes” me targë AA 234 IA është djegur pjesërisht pas një zjarrvënieje të qëllimshme.

Ngjarja ka ndodhur në rrugën “Medar Shtylla”, pranë zonës së “Komunës së Parisit”, në Tiranë.

Makina e avokates ka qenë e parkuar në hapësirën mes pallateve të një blloku banimi.

Dëshmitarët, sapo kanë parë flakët kanë lajmëruar menjëherë zjarrfikësit.

Ngjarja

Sipas burimeve nga Policia e Tiranës, ngjarja ka ndodhur pak pas mesnatës së të mërkurës duke gdhirë dita e enjte, në rrugën “Medar Shtylla”. Pas shuarjes së zjarrit, kanë nisur veprimet hetimore në vendin e ngjarjes, ku është konstatuar vatra e zjarrit.

Më pas janë marrë në pyetje pronarja e mjetit, avokatja me iniciale G.M., si dhe bashkëshorti i saj. Burimet thanë se është marrë në pyetje edhe vëllai i avokates, 28-vjeçari me iniciale K.M., i cili në ndonjë rast e përdorte këtë makinë.

Megjithatë nga deklarimet nuk ka rezultuar se këta persona kanë ndonjë problem personal, qoftë me banorët e zonës ku ndodhi ngjarja, apo edhe me persona të tjerë. Një nga pistat ku po hetohet aktualisht ka të bëjë me detyrën e pronares së automjetit.

Dëshmitë

Të afërmit e avokates, së cilës iu dogj makina, treguan se fillimisht flakët janë shuar nga punëtorët e një picerie që ndodhet pranë vendngjarjes. Më pas aty kanë shkuar edhe zjarrfikësit dhe forcat e Policisë.

“Fakti që makina ka marrë flakë shumë shpejt dhe në pjesën e pasme, afër gomës nga krahu serbratorit, jemi të bindur që ka qenë zjarrvënie e qëllimshme, që synonte shpërthimin e makinës”, shprehen familjarët e avokates.

Ata tregojnë se të njëjtat pretendime i kanë ngritur edhe në Polici, në momentin që kanë dhënë deklarime për ngjarjen.

“Ajo që ne mendojmë është faksi se kjo ngjarje është ose akt frikësues, ose hakmarrës nga njerëz të pakënaqur për ndonjë çështje të vjetër, pasi kjo është makina që G.M. përdorte për të shkuar në punë”, shprehen ata.

Ndërsa ngrenë dyshime për veprimet e kryera në vendin e ngjarjes, pasi sipas tyre deri tani nuk janë verifikuar as kamerat e sigurisë së lokaleve dhe as nuk janë marrë në pyetje dëshmitarët, së paku ata që shuan zjarrin.

Për të marrë lajmet e fundit të “DuaLajm.com”, ndiq edhe faqen tonë në Facebook